Bela zaint ch' a zirè in piaza
coun al mascar su la faza,
ch'avi impià dla vostra algrì
tòti al stred e i merciapì
e avì tgnò bain indla maint
càst anuèl apuntamaint,
càsta festa acsè impurtant
ed curiand'l e strél filant:
bazanis ed tòti al fata,
zaint che acsè propri an s'in cata,
tant ch' a per ch'in sta zitè
ai staga intira l'umanitè!
Bianch e nigar, elt e bas,
bròt e bì, megar e gras,
cino (puch) e vìc' (soquant),
san e mat, dieval e sant,
chi al bàv lat e chi al bàv vein,
magnadur 'd sòpa e 'd turtlein,
magnaprit e cisarù,
réch sfundà e magnafasù,
fiù 'd la Felz e anvud dla Fiama;
ma tòt foi 'd la vecia rama
ed la Maila coun i Gran:
tòt vuetar, zaint 'd Bazan!
E vuetar, furastir
ed Castlàt e 'd Maunt San Pir,
ch'a sì gnò in màchina o a pì
da Crasplàn o da Muntvì,
da Savégn, Savgnan, Anzòla,
féin da Casalàc', da Vgnola
e da Modna e da Bulàgna
par psaiv goder sta cucagna:
bona ander in zir a ches,
vultè i ùc', livè sò al nes,
furastir e bazanis:
parchè, ades ch'i ein pasà i mis,
anch stavolta, a Caranvel,
saimpar réch e saimpar bel
l'è turnà sàta a la Roca
Barbazèch dla Cà di Zoca!

Mo av dirò che, p'r ariver,
ai ho dvò un poc fadigher.
A ciaper la Bazanais,
me a 'riveva st'etar mais:
an i è machina ch'la s mova,
e an l'è pò 'na storia nova;
maintar che la superstreda
an s capés duv la sì andeda
- me an voi fer al pesimésta,
mo a i è quecdoun ch'l'ava vesta?
Préma ch'l'ariva a Pragat
nuet'r a srain tòt dvintà mat:
e s'i an fan la feruvì
as farà premma a 'nder a pì.
Pian e adesi, chelm e laint,
dàp la Mòfa, finalmaint,
intal vgnir, 'm saun més a guarder:
oh! l'um pariva 'd sugner:
la culeina 'd Cisa e Roca
gnanch l'as vdiva, luntana e fioca;

l'as liveva, 'd chè dal fiòm,
com 'na nàbia 'd paulvra e 'd fòm,
e un'insàm 'd fer e zimaint
al carsiva ogni mumaint
duv ai eran camp e prà:
capanoun, palazoun, cà...
però lè un cartel l'avert:
"paiais 'd storia, zitè d'ert!"
Mo in paiais - o "indla zitè"? -
i ein dimondi al nuvitè!
i han fat novi tòti al vì
coun aiol e merciapì:
ed Bazan i han fat al vant
ed parcàg', e fiur, e piant,
spartitrafich e ringhir:
pò lanteren, lòm, lumir,
lampiunzein in bas e in elt:
acsè, quand t'ì in streda e t selt,
te, coun ste sbanderen 'd lus,
t vàd s'l'è un cordulo o s'l'è un bus!
L'è arivà al mumaint 'd finir,
anch s'agh in sréven da dir
da ster chè almanch fein a zògn;
mo a capés dal vostar grògn
che l'è mei ch'am faga mut
e ch'av daga al mi salut
e anca quàl ed la mi sgnaura
ch'la m'ha acumpagnà què 'd saura.
A salutain, p'r al prinzépi
al sgnaur Send'ch e al Munizépi,
ch'a sperain ch'i an s'la sin tolta
se agh'i ho dà un pò zà, stavolta;
a salutain la forza pòblica
ch'l'è al servézi dla Repòblica;
a salutain don Franzàsch,
ch'as mantégna saimpar fràsch;
e pò don Atéli e al sor,
ch' a tgnain tòt i dé intal cor.
A salut al Comità
che anca st'an l'ha urganizà
quasta festa 'd grand e cein,
coun i car e col trinein.
E tòt vuet'r ch' a sì a Bazan
vgnò dedchè e vgnò da luntan
in quast dé 'd gran cuntintàza
ch'a guarderuv l'è 'na blàza,
tòt vuet'r, populaziaun,
a salut. E a sper dabaun
che a psì ster luntan dal mel
fein a st'etar Caranvel!

Barbazèch dla Cà di Zoca