Av saluta Barbazèch
che da pov’r al s’è fat réch
e tót i an, par Caranvel
al vd’ saimpar tel e quel.
Quand ed péla agh’n ira poca
a saun nà in dla Cà di Zoca.
Par avair almanch speranza
ed rimpir un poc la panza
a saun andà a zercher furtouna,
e arivà squesi a la louna:
in America, a Bruxelles,
a Parigi, a Montbudel!
E a la fein a i ho avó nes,
la furtouna l’um dé un bes:
tant ch’a i ho psó guadagner
‘d bi baiuchm che a regaler
am la god cumpagn un mat.
Eh? Sa giv? Cum’hoia fat?
…Al so me! Mo zertamaint
an ho mai ciapà tanzaint.
E anca s’a saun stà luntan
an ho mai scurdà Bazan:
mo tót i an par Caranvel
sì ch’al piova o al faga bel
a vegn chè caun mi muiera
tóti al volt pió bela e cera.
Mo stavolta, a ariver què
a i ho fati dificultè.
L’è stà propri un lavurir:
um pariva d’amatir;
quast’Italia l’è un afer
ch’an s capés pió duv ander!
“Zainterdestra”, “zaintersinéstra”…
a i ho pers la streda mestra,
e tra pulman e biziclàt
tót i andeven cum di mat.
An s capiva un azidaint;
forsi a i era un inzidaint:
che tót quant, in preda al panich,
i zercheven un… Macanich!
Ades basta racunteruv,
ch’an voi brisa pó stuferuv.
Anzi, am sa che vu av dmandè:
“An la fnés mai pió, lu lè?
Quasta mascra, bain, sa vóla?
Barbazèch, dí só! Cum fóla
ch’t’è tacà a canter ‘na gnola
che l’ariva fein a Zola?”

Quast, a pains, av dmandarì:
parchè, forsi, vu an savì
che què, incù, l’è un ucasiaun
da sturer dal vein ‘d cal baun:
che stavolta l’è un gran quel,
brisa al solit Caranvel:
che quast an l’è al só trentesum
da quand me agh i ho dà al batesum.
I ein traint’an ed car in piaza
caun la zaint ch’l’as dpenz la faza,
caun la pesca e al carsintein
par i grand e i pió cinein.
A pains ch’al sì da ringrazier
tót qui ch’i s’ein stà a adaner
in cast taimp, par fer cuntaint
me, Bazan e la so zaint
(p’r an parler – mo as pol capir –
ed tót quant i furastir).
Ringraziaini tót insàm:
an stag brisa a fer di nàm:
a pert Sergio, che da la traza
al presainta chi a i è in piaza.
Po a tacain a saluter,
che l’è beli aura d’ander.
Salutain par prém al prit
che se no as la liga al did,
salutain par prémi al sor
che se no al s’la préven tor;
salutain l’autoritè
ch’la guverna sta “zitè”;
e po me av salut tót quant,
qui da gninta e qui impurtant.
L’av saluta anch la mi spausa,
che l’è saimpar maraviausa.

Che a psì ster luntan dal mel
fein a st’etar Caranvel!

Barbazèch dla Cà di Zoca