Bazzanis!

L’è un pruverbi cuntadin

ch’ l’acqua torna al so mulin.

Questa l’è una verità

ch’a la vdi verificà

l’an del 70 qui in Bazzan

dov al torna e al v’stend la man,

pin d’quattrin e pin d’berloca,

Barba Zecc d’la Cà di Zoca.

I mi bsnon, cargh d’or e argent,

emigron fin del tersent

dalla Roca d’Montalban

vgnand a star tutt a Bazzan.

E la storia d’la mi Cà

l’è sicur ch’la s’truvarà,

s’al la zerca cun impegn

l’umarin dalla man d’legn,

che, per dscruvr’ egl’ oss d’mi nona,

s’taiarev anch la man bona.

Quest’è zert che i vicc d’la Zoca

què tiravn’al col all’oca:

què in alligra cumpagnì

s’fava d’gran spanucciari:

què in sta piazza, ch’era l’ara,

el don vgnevn’a zintunara

da Merlan, Tiola, Badì,

Saravall, Savign, Montvì.

E da mont anch più lontan,

essend zerti che in Bazzan

el truvavn’i Bazzanis

tutta cresta e tutt baìs.

Donca en fadi meraveja

s’l’ultem ram d’qla gran fameja,

traversand mar mont e pian,

dop 70 an torna a Bazzan

cun ql’algrì ch’l’ha eredità

dai su non e dal so pà.

L’è st’algrì ch’m’ha miss in testa

d’introdur una gran festa

in Bazzan, cun mascherà

tant a pì quant insturià

sovra bi carr triunfal,

i ultem dì del Carenval;

e a son zert d’utgnir l’intent

d’un brillant divertiment,

perchè, massm’al temp d’adess,

tutt el mascher fan progress.

Bazzanis! rimpì el panir

d’bon confett e bumbunir,

e pò quand av salta l’ester,

timpstà a gara tutt quell fnester

dov s’i trova, a mazz battù,

la più bella zuventù.

N’avà pora ch’el confett

possen fari mal al pett,

perchè i pett del donn d’collina

en cm’è i mur fatt in calcina

ch’ai psi batter e smartlar

senza vedri sgarniar.

Bazzanis! mi a fazz qualch gir

in t’al cors e pò m’ritir.

Vu, gran banda musical,

dà prinzipj ai son marzial,

e vu popol ch’ascultà,

fam corona, lungh la strà.

Barbazecc ch’en s’pol saziar

d’accoglienza ch’al s’ved far,

al ve fa i su basaman,

al v’invida tutt per dman

a far splendid al final

d’ste magnific Caranval.

E frattant, cun tutt al fià,

a nom anch d’la Sozietà,

al v’ringrazia e d’cor al v’dis:

viva, viva i Bazzanis!